Üzgüçülərimiz yarışın birinci gününü 1 gümüş və 2 bürünc mükafatla başa vurub.

Gəncə şəhərində start götürmüş MDB Oyunlarının üzgüçülük yarışlarında 8 ölkədən 84 üzgüçü mübarizə aparır. Üzgüçülük üzrə Azərbaycan milli komandasının üzvləri günü 1 gümüş və 2 bürünc medalla başa vurublar.

Yarışın ilk günündə aşağıdakı üzgüçülərimiz fəxri kürsüyə yüksəlib:

Sərbəst üsulla 1500 metr – Süleyman İsmayılzadə (gümüş medal)

Qarışıq üsulla 200 metr – Yeqor Maynitski (bürünc medal)

“Butterfly” üsulu ilə 100 metr – Mehri Əbdürəhmanlı (bürünc medal)

Qeyd edək ki, üzgüçülük üzrə milli komandamızın üzvləri MDB Oyunları tarixində ilk dəfə medal qazanıblar.

Və xatırladaq ki, III MDB Oyunları 28 sentyabr – 8 oktyabr tarixlərində Azərbaycanın 7 şəhərində keçirilir və müxtəlif idman növlərində iştirakçı ölkələrin idmançılarını bir araya gətirir. Üzgüçülük yarışlarına Gəncə evsahibliyi edir.